Zaman felâketlerden qurban çoçuklarnıñ hatırasına*
Avuçımda bütün dünya, ğaflet dünya,
Qopmay fiğan, qopmay boran – sessiz dünya,
Yas qıynamay süküt turğan, yüzsüz dünya,
Qorqma, babam, bar Yaradan, yar – Yaradan!

Sürgün oldım Vatanımdan, bu dünyadan,
Dünya içün, imdat bekleyim yalıda,
Babam ağlay, haberi yoq bu alımdan,
Qorqma, babam, bar Yaradan, yar – Yaradan!

Közlerimden közyaş degil, deñiz aqa,
Aq dalğalar ep urula dudağıma,
Dünya seyir etip, baqa ayağıma,
Qorqma, babam, bar Yaradan, yar – Yaradan!

Kin qusqannıñ kölgesine meni ata,
Caillerniñ tebessümge sarıp, yuta,
Günâhlarnı yapqan sayın dünya bata,
Qorqma, babam, bar Yaradan, yar – Yaradan!

Bala ağlay, er kök ağlay, yürek ağlay,
Mazlumlarnıñ feryatları qalpke sığmay,
Ümütlerni, soñ nefeste, Haqqa bağlay,
Qorqma, babam, bar Yaradan, yar – Yaradan!

Bu yalıda tenim degil, dünya cansız,
Ölü kibi yarasız oldı ve qansız,
Ğaflet dünya, tövbe eyle, qalma tañsız,
Qorqma, babam, bar Yaradan, yar – Yaradan!

Essiz olma, cansız qalma, dünya, uyan!
Boranlarnı mende sınap, Haqqa tayan,
Horluqlarğa men dayandım, sen de dayan!
Qorqma, babam, bar Yaradan, yar – Yaradan!