Ulu hocamız İsmail Gaspıralı’ya

Küneş ol, evlâdım, küneş nur saçar,
Nur üstünde nur ol, nur sırnı açar,
Sırnı açsañ, senden cailler qaçar,
Söndirme, evlâdım, birlik nurımnı!

Punarnıñ temiz em coşqun sesin al,
Ruzgârnıñ serbest em saf nefesin al,
Baarde lâleniñ mis qoqusın al,
Yaşat sen, evlâdım, birlik duyğumnı!

Er vaqıt ışıq ber aqıl-fikirge,
Tüşünceñ ep olsun Ana tilinde,
Daima elâl iş kelsin eliñden,
Unutma, evlâdım, birlik ğayemni!

Can içinde can ol, canda bar birlik,
Canlar birlik olsa, anda bar erlik,
Can canğa yük olmaz, anda tirilik,
Bıraqma, evlâdım, birlik yükümni!

Alemde öz halqıñnıñ sen misali ol!
Bütün türk aleminiñ sen lisanı ol!
Turan dünyasınıñ sen fidanı ol!
İç coyma, evlâdım, birlik yolumnı!